Višnjan presudio Pustu

I Višnjan je ove godine tradicionalno presudio svome Pustu, glavnom krivcu za sve nedaće koje su mještanke i mještane zadesile protekle godine. No, kaže nam direktorica TZ Višnjana Romina Sinosich, ove su godine višnjanskim maškarama stigli i gosti, poznati Ptujski zvončari koje je meštrica Sandra Fabac dovela na prijem u nove prostorije TZ-a. Tu su kušali vina višnjanskih proizvođača, a onda u pratnji Korada Korlevića obišli zvjezdarnicu na Tičanu i poslušali zanimljivo predavanje. Nakon toga krenula je fešta, i uslijedila presuda. Evo kako je to izgledalo.

TUŽITELJ: Dobar dan dragi Višnjanci i svi gosti, dobar dan drage maškare, i moj veliki naklon poroti i mojen najdrajžen sucu. Eko mene kao studenticu prava, pripala mi je ta obaveza i čast da se borim za pravdu u ime svih maškara Višnjana.

Alora, svi se pitate ki je on. Ma on van je jeno veliko Višnjansko niškoristi i veliki lakodelac. Samo po oštarijami klati, po cile dane po Jacku i Havani mlati. Mladež Višnjana nan grdo puti, i hi vadi samo fumati, zbog tega ga tribamo užgati!

BRANITELJ: Prigovor! Ma dajte lipi moji judi, ma ča je grih fumati, tar onaj put bi tribalo i sve nas žene u pržun poslati. A to ko su nan neka dica skrenula s dobrega puta, ne moremo kriviti njega, forši da smo hi boje zgojili, nan nebi sada takovi bili!

TUŽITELJ: Čekajte, čekajte, ni to sve! Tek smo na početku! Su vidli judi da je našen susedi Zvani drva i pršuta pokreja, pak hi je s preteli u konobi Pentagonu poija.

BRANITELJ: To je laž, tu noć je cilo vrime s namon u posteji bija!

TUŽITELJ: Ma znate ča je još učenija! Na igralištu anka mriže na golima je porazbija, pak je s ton mrižon na moru lovija. Ma znate da taj sakramenski frajer ni ovo lito stija nanka lipe za maškare špendati, ma pero lani je moga s nas za niš isti, piti i fešteđati, a šolde od maškar sebi pobrati. Kriv je ki je pomoga u Višnjanu feštu od štrigi i cuk učeniti, bi bilo boje da je hodija u crikvu Boga moliti.

BRANITELJ: Nije istina, nije kriv!

TUŽITELJ: Krivo to, je ovu zimu bila črna zima da se je više Boga molilo, ne bi se bilo toliko ulik sledilo. Kriv je ki se nisu kokoše cipile protiv gripe, sad su brižne bone i pak lipi moji judi, ovo lito ne budete jili frite.

BRANITELJ: Mala, nemoj predikati štupidece, kako on more biti kriv, ni on vetrinarijo.

TUŽITELJ: KRIV JE!!!!

BRANITELJ: Još si ne znas nanka mudante uprati, a jude biš u pržun stila slati!

Sudac prekida raspravu, savjetuje se sa orotom, i presuđuje pustu po staroj dobroj tradiciji kao primjer svega slabega ča se je u Višnjanu desilo. Osuđuju ga na paljenje.

SUDAC: Mir u sudnici! (LUPA BATON) Judi moji, da prekinemo tu kobasicu, ja i moja porota smo deštinali da ćemo tega višnjanskega frajera zapaliti pa će nan svima skupa drugo lito lipše biti. Sad gremo svi skupa ča dobrega pojisti i popiti, i pokle u naše lipo kino do jutra se veseliti. Dragi moji Višnjanci, provajte se više voliti i jedan drugega kapiti pak će nan svima skupa lipše u Višnjanu biti!

(dp)